24.11 2015

Möguleg brunahætta af þurrkurum frá Indesit, Hotpoint og Creda

Möguleg brunahætta af þurrkurum frá Indesit, Hotpoint og Creda

Mannvirkjastofnun vekur athygli á öryggisviðvörun varðandi þurrkara frá Indesit, Hotpoint og Creda, vegna brunahættu sem af þeim getur stafað. Hættan stafar af því að í einhverjum tilvikum getur ló komist í snertingu við hitald (hitaelement) og valdið bruna. Þurrkararnir voru framleiddir frá því í apríl 2004 þar til í september 2015 og voru seldir víða um Evrópu. Mannvirkjastofnun hafa ekki borist upplýsingar um hvort viðkomandi þurrkarar hafi verið seldir á Íslandi, en líkur eru þó á að svo sé. 

Rafföng: Þurrkarar. 

Framleiðandi/Vörumerki: Indesit, Hotpoint og Creda. 

Hætta: Brunahætta. 

Þekktir söluaðilar á Íslandi: Ekki vitað, enn sem komið er. 

Sölutímabil: Frá árinu 2004. 

Framleiðandi þurrkaranna hefur sett upp vefsíðu þar sem eigendur og notendur þurrkara geta athugað hvort öryggisviðvörunin nái til þeirra gerða sem þeir eiga/nota. Jafnframt upplýsir hann að þar til gert hafi verið við þá þurrkara sem brunahætta getur stafað af skuli einungis nota þá undir eftirliti, þ.e. ekki um nótt þegar fólk er í svefni eða þegar enginn er heima, og gæta þess að hreinsa síur o.þ.h. 

Mannvirkjastofnun beinir því til allra eigenda og notenda þurrkara eins og hér um ræðir að athuga þegar í stað hvort brunahætta geti stafað af þeim og hafa samband söluaðila og/eða framleiðanda. 

Sjá vefsíðu framleiðanda þar sem hægt er athuga hvort brunahætta geti stafað af þínum þurrkara

Sjá einnig frétt í breska vefritinu Mail Online