20.12 2018

Nýr og lögbundinn gagnagrunnur fyrir orkutengdar vörur

Nýr og lögbundinn gagnagrunnur fyrir orkutengdar vörur

Frá og með 1. janúar 2019 er skylda að skrá allar orkumerktar vörur í nýjan gagnagrunn sem kallast EPREL (European Product Registry for Energy Labelling). Öllum aðildarríkjum EES er skylt að taka hann í notkun.

Framleiðendur og innflytjendur á orkutengdum vörum sem bera orkumerkingar bera ábyrgð á að setja upplýsingar um vörur í EPREL gagnagrunninn. Upplýsingar skulu skráðar áður en vörur eru settar á markað. Gagnagrunnurinn verður tekinn í notkun um miðjan desember á þessu ári en upplýsingarnar verða ekki gerðar opinberar fyrr en í apríl 2019.

Allar vörur framleiddar eftir 1. janúar 2019 verður að skrá í gagnagrunninn áður en þær eru settar á markað. Vörur sem þegar eru á markaði skal skrá í grunninn fyrir 30. júní 2019.

Nokkrar mikilvægar dagsetningar fyrir framleiðendur og innflytjendur

  • 1. ágúst 2017: 
    Vörur sem voru settar á markað fyrir 1. ágúst 2017 má skrá í gagnagrunninn frá og með 1. janúar 2019. Þetta er hins vegar valfrjálst.
  • 1. janúar 2019: 
    Allar nýjar vörur sem eru settar á markað eftir 1. janúar 2019 verða að vera skráðar í gagnagrunninn.
  • Apríl 2019: 
    Upplýsingar í gagnagrunninum verða sýnilegar markaðseftirlitsstjórnvöldum og neytendum.
  • 30. júní 2019: 
    Fyrir þessa dagsetningu skulu allar vörur sem voru settar á markað frá 1. ágúst 2017 til 31. desember 2019 vera skráðar í gagnagrunninn.


Gagnagrunnur, nokkrir kostir
Með innleiðingu gagnagrunnsins, verður mun auðveldara fyrir neytendur að finna og bera saman orkutengdar vörur. Söluaðilar sem þurfa nýjar orkumerkingar eða ný vöruupplýsingarblöð geta sótt ný beint úr gagnagrunninum. Einnig verður markaðseftirlit gert auðveldara fyrir markaðseftirlitsstjórnvöld þar sem eftirlitið verður skilvirkara vegna betri yfirsýnar yfir vörur á markaði. Á þennan hátt stuðlar EPREL að sanngjarnari samkeppni milli birgja og að neytendur fái rétt merktar vörur og geti gert samanburð á vörum. Birgjar geta einnig séð hvenær markaðseftirlitsstjórnvöld sækja tækniskjöl.